1Th 4 | PONPDN | STEP | ARI, ri ai kan, se pil poeki re omail o panaui kin komail Kaun Iesus, duen me komail aleer san kit, o duen me komail en kekeideki wei, o kaperenda Kot, iduen omail kakairida.

1 Thessalonians 4

1 ARI, ri ai kan, se pil poeki re omail o panaui kin komail Kaun Iesus, duen me komail aleer san kit, o duen me komail en kekeideki wei, o kaperenda Kot, iduen omail kakairida. 2 Pwe komail asa duen kusoned akan, me se pan on komail ren Kaun Iesus. 3 Pwe iet kupur en Kot, omail sarauila, pwe komail en liki san nenek. 4 Amen amen en kanai on pein war a, pwen saraui o wau o liki san inon sued, 5 Kaidin ni dender on inon sued duen men liki kan, me so asa Kot; 6 O sota me pan piti de kasapuni on ri a ni meakot, pwe Kaun o pan kotin iki on i, duen me kit inda o kadede on komail er mas o. 7 Pwe Kot sota molipei kitail on samin, a pwen saraui. 8 A ma amen komail pan mamaleki mepukat, kaidin aramas me a pan mamaleki pwe Kot, me pil kotiki on komail er sapwilim a Nen saraui. 9 A duen limpok en saulan, menda i en intinki won komail, pwe pein komail padakki san ren Kot, me komail en pokepena. 10 Nan met komail kin wiai on saulan karos, me mimi Masetonien pon. A se panaui kin komail ri at akan, komail en kakairida. 11 O komail nenenla o inon ion apwali pein omail dodok, kadokeki pein pa omail, duen me se padaki on komail er, 12 Pwe komail en sansal mau mon me mi liki kan, o komail der mau on amen en apwali komail. 13 Ri ai kan, se sota men oki san komail duen me mairelar akan, pwe komail der insensued dueta irail, me sota ar kaporopor. 14 Pwe ma kitail kamelele, me Iesus matala ap iasadar, nan iduen me mairelar ren Iesus, Kot pil pan kalua ir ala re a. 15 Pwe ieteten me se indan komail ni masan en Kaun o, kit me memaureta lao Kaun o pan kotin pwarado, sota pan ko wei mon me mair akan. 16 Pwe pein Kaun o pan kotido san nanlan ki masan laud, o kapiti en toulan lapalap amen, o koronete en Kot; me melar akan ren Kristus ap pan maureda mas. 17 Kit me memaureta luadi ap pan ian ir peukadala nan dapok kan, ko on ren Kaun o nan wawa, kitail ap pan mimieta ren Kaun o kokolata. 18 Komail ari kamaiteki komail la padak pot et.